Бектеши му порача на Коста Петров да ја прочита владината програма, страна 39, параграф 3

Министерот за економија Крешник Бектеши порача денес сите оние кои ја коментираа неговата вчерашна изјава за стимулирање на приватните компании да вработуваат лица од етничките заедници, да ја прочитааат програмата на Владата.

„Што се однесува до коментарите што ги слушав и од политичари, но и од аналитичари, сакам да ве повикам на владината програма која се усвои од страна на Собранието и која ние сме должни да ја спроведеме“, рече Бектеши.

Како што рече, детално ги упатува сите оние кои коментираа да го видат делот од програмата насловен Еднакво општество за сите.

„Таму, на страна 39, параграф 3 ќе виддите како приближно ќе изгледа мерката“, рече тој додавајќи дека ова важи и за политичарите да ги читаат владините програми пред да даваат коментар, посебно оние политичари кои ја добиле довербата да владеат во четиригодишниот мандат.

„Ако не ја знаат, значи страната е 39, параграф 3 во владината програма, нека ја прочитаат, бидејќи за таа програма гласале и тие“, повтори Бектеши.

Иако не именуваше конкретно ниту еден политичар, оваа негова порака, меѓу другото, се однесува и на потпретседателот на СДСМ Коста Петров кој реагираше вчера на Фејсбук по прес конференцијата на Бектеши:

„Ти зборуваш за иновации, нови технологии, artificial intelligence, biotech, data science, креативност, тој за субвенции за етнички вработувања. Едно иновативно општество за сите“, напиша Петров.

Бектеши денес на прес конференцијата повтори дека не верува дека има несогласување во Владата по ова прашање. Тој рече дека сите компании што се основани и раководени од Албанец ако во неговата приватна компанија вработува Македонец тогаш ќе биде поддржан од страна на Владата, а тоа ќе биде направено на инклузивен начин и граѓаните да се доближат што повеќе. Оваа мерка ќе се реализира зошто е обврска што произлегува од владината програма што е усвоена во Собранието и нема отстапка од владината програма – изјави Бектеши.

Инаку, во програмата на Владата од 2020 до 2024 година, во делот на кој што се повикува министерот Бектеши (Еднакво општество за сите), се вели: „Владата ќе го повика, охрабри и ќе соработува со бизнис секторот т.е. домашните и странски компании да ги поддржат добрите меѓуетнички односи и вредностите на толеранција, застапеност и меѓусебна доверба и во нивните работни средини, за да се искористи целокупниот човечки потенцијал со кој располага нашата земја“.

Иако Бектеши вели дека во Владата нема судир околу ова прашање, факт е дека од различни функционери стигнуваа различни толкувања на овој параграф, а исто така и во јавноста се толкува различно.

Бектеши денес на прес конференцијата додаде дека се разгледуваат неколку опции како наредната година да се спроведе овој дел од програмата, но не прецизира колку средства би биле предвидени во Буџетот, додавајќи дека мерката би можела да се спроведува преку Агенцијата за враотување.

Субвенционирањето на компаниите кои ќе вработуваат лица од други етнички заедници ќе се однесува на сите фирми и на целата територија на земјата, рече Бектеши. (М.Ј.)