Бектеши го нарече неодговорно однесувањето на „Макпетрол“

„Макпетрол“ беа известени за преговорите на државата со „Булгартрансгас“. Ме зачудува фактот што вчера одржале состаноци со надлежните институции, разговарале за сите услови кои се предвидени за договорот меѓу „ГА-МА“ АД и „Булгартрансгас“, немале никакви забелешки, односно тие што ги имале ги разјасниле и денеска наеднаш излегуваат со соопштение дека нема да увезуваат, истакна вечерва министерот за економија Крешник Бектеши.

Тој во гостување на Тема на денот во вестите на ТВ Сител оцени дека станува збор за неодговорно однесување од страна на компанијата, како и дека чекорите на државата се во насока на избегнување на  целосна зависност од Руската Федерација.

-Ние се залагаме да се либерализираме, сите консултации се завршени и таа обврска што сме ја земале како држава према енергетската заедница, преку регулативите на Европската унија, ние веќе ја спроведуваме. Ако не донесевме ваква одлука можеме да се доведеме во ситуација  да бидеме целосно зависни од Руската Федерација. Што ќе се случеше ако преку ноќ имаше забрана за снабдување со природен гас на нашата држава?- рече Бектеши.

Според него, „Макпетрол“ веќе 21 година го има монополот за снабдување со гас во државата, но заврши времето на монополи и Владата се залага за либерализација на пазарот, вклучително и пазарот на природен гас, како што е во другите сектори. За министерот загрижувачки е тоа што „Макпетрол“ како компанија  не покажала општествена одговорност и информира дека во таа насока било разговарано за носење на закон кој ќе го регулира однесувањето стратешките компании во време на криза.

-Според мене ова е неодговорно однесување  од страна на компанија каква што е „Макпетрол“ и за жал можно е и да има и надворешни сили кои влијаат врз ваквите одлуки, но ние сме демократска држава, имаме закони и ќе постапиме согласно законите, вклучувајќи го тука и „Макпетрол“. Ме загрижува фактот што една од најголемите компании не покажа ни мала општествена одговорност за сите овие децении, а се тоа што го направиле е од овие граѓани. Дополнително разговарав и со претседателот на Владата и дадов задолжение  на правниот тим на Министерството за економија да постапат и да најдеме во што побрз рок законски решенија за начинот како да се однесуваат одредени стратешки компании во време на криза, по примерот на другите држави како Германија и Италија, рече Бектеши.

Соопшти дека денеска било разговарано и најверојатно ќе бидат најдени други опции за снабдувањето, затоа што имало простор до 1 јануари следната година, за што Министерството дополнително ќе инфомира најдоцна до вторник. Во однос на претходните понуди доставени од претседателот  на опозицијата Христијан Мицкоски рече дека се неприфатливи затоа што доаѓаат од Руската Федерација.Обвини дека „Макпетрол“ и во минатото покажала неодговорно однесување.

– Таа е една од најголемите компании и не е првпат што прави вакви работи, Граѓаните се сеќаваат од времето кога ги затворија бензиските пумпи и не точеа дизел заради тоа што требаше да чекаат само еден ден за Регулаторната комисија за енергетика да носи нова одлука за зголемување, појасни тој.

Во однос на заинтересираните компании кои во иднина би го вршеле снабдувањето на пазарот рече дека има понуди до ЕСМ, но не откри од каде доаѓаат.

„Макпетрол“ претходно соопшти дека од 1 јануари нема да увезува и да испорачува природен гас до своите потрошувачи. Во соопштението испратено до јавноста, „Макпетрол“ посочи дека причина за ваквата ситуација се новите услови за работа кои ги предвидува, според нив, прерано потпишаниот договор за интерконекција меѓу државното претпријатие „ГА-МА“ АД и „Булгартрансгас“, со што не се применливи досегашните услови според кои компанијата увезува и испорачува природен гас до своите потрошувачи.