Бајден најави 700 тенкови за Украина и нови санкции против руските елити

Американскиот претседател Џо Бајден за време на неговата посета на Киев најави испорака на неколку стотици тенкови за Украина од САД и партнерските земји. Тој, исто така, рече дека оваа недела ќе бидат објавени повеќе санкции против руските елити и компании кои се обидуваат да ги избегнат постоечките ограничувања и „да ја поддржат руската воена машина“, објави Ројтерс.

Заедно со сојузничките земји, Соединетите Држави ќе ѝ префрлат на Украина 700 тенкови, илјадници оклопни возила, илјада артилериски системи, повеќе од 2 милиони гранати, неколку десетици повеќекратни ракетни системи за лансирање, како и системи за противвоздушна одбрана, најави американскиот претседател.

Бајден најави и пакет воена помош од 500 милиони долари, која ќе вклучува артилериска муниција, противтенковски системи и радар за воздушно набљудување „за да помогне во заштитата на украинскиот народ од воздушни бомбардирања“. Детали за новиот пакет ќе бидат објавени подоцна.

„Одлуката на САД за тенковите ‘Абрамс’ ги постави темелите за создавање тенковска коалиција и е од историско значење“, рече Зеленски на прес-конференција. Според него, преговорите меѓу Киев и Вашингтон станале сериозен поттик за неговата земја. „Овој разговор не носи поблиску до победата. Резултатите од оваа посета секако ќе бидат видливи и секако ќе се одразат на бојното поле за време на ослободувањето на нашите територии“, додаде тој.

Западните влади на крајот на јануари ги објавија плановите за пренос на тешки тенкови во Украина. Сепак, објави весникот „Тајмс“, до почетокот на предвидената пролетна офанзива на руската армија, вооружените сили на Украина ќе добијат помалку од една четвртина од ветените оклопни возила. Според изданието, Киев очекува испорака на 320 западни тенкови, но само 50 од нив ќе можат да стигнат до линијата на фронтот до почетокот на април.

Бајден го напушти Киев околу 14 часот по локално време. Тој пристигна во главниот град на Украина во 8 часот изутрина.