Австрија затвора џамија по нападот во Виена

Австриските власти затворија џамија и исламско здружение во кои честопати доаѓал човекот кој во терористички напад во Виена на почетокот на оваа недела уби четири лица.

Министерката за интеграција Сузана Раб и министерот за внатрешни работи Карл Нехамер во петокот објавија затворање на џамијата Тевхид во Виена и здружението „Мелит Ибрахим“ по состанокот со претседателот на Заедницата на исламската вера во Австрија, Амит Вурал, објавија локалните медиуми.

Одлуката уследи откако 20-годишен приврзаник на таканаречената терористичка група Исламска држава во понеделникот вечерта тргна во смртоносно дивеење во главниот град на Австрија, при што загинаа четворица. Напаѓачот беше застрелан од полицијата.

Вооружениот човек честопати бил во џамијата и здружението, рече Раб, велејќи дека одлуката за затворање е донесена во име на националната безбедност, бидејќи е утврдено дека двете институции не држат „позитивен став кон општеството и државата“, како што е наложено во таканаречениот „Исламски закон“.
Но, таа истакна дека на овој потег не треба да се гледа како на напад врз исламот или муслиманите. „Целта на тероризмот е да внесе клин во нашето општество – меѓу муслимани и немуслимани“, рече таа.

На истата прес-конференција, министерот за внатрешни работи призна неуспеси во разузнавањето пред нападот, велејќи дека „се направени непростливи грешки“.

Австрија веќе призна дека не успеала во „комуникацијата“ со словачките разузнавачи, кои ги известија Австријците дека вооружениот човек се обидел да купи муниција таму. Во петокот, Нехамер рече дека ова лето човекот бил во контакт со луѓе кои веќе биле под надзор на виенската регионална канцеларија на главната домашна разузнавачка агенција на земјата, Заштита на уставот и контратероризам (ЛВТ).

Шефот на виенскиот оддел на ЛВТ сега е суспендиран додека трае истрагата, рече на прес-конференцијата шефот на полицијата Герхард Пирстл.