Археолошките истражувања кај Видин Град, Градско – антички Аргос, продолжуваат и следната година

Институтот за археолошки истражувања-Скопје, соопшти дека со поддршка на Министерството за култура во рамки на годишната програма на проекти од национален интерес, веќе четврта сезона врши археолошки истражувања на античкиот град кај село Водоврати, Градско, кои годинава донеле нови вредни сознанија за населбата.

Според Институтот, овој малку познат антички центар идентификуван е со градот Аргос во Пајонија. Според најновите сознанија, градот постоел од самите почетоци до самиот крај на Антиката.

– Благодарение на истражувањата на Институтот за археолошки истражувања, предводени од д-р Дамјан Донев, разјаснета е хронологијата на оваа населба, нејзиниот обем, како и основните црти на нејзината топографија. Откриени се одбранбениот ѕид со главните градски порти, градското средиште со ранохристијанска базилика и неколку јавни градби со непозната намена, како и дел од градските некрополи. Со овогодинешните ископувања, беше пронајден и дел од градска улица на западната, највисока тераса, што претставува драгоцен податок за просторниот план на населбата, се посочува во соопштението.

Планирано е истражувањата на овој локалитет да продолжат и наредната година, при што, во соработка со Археолошкиот музеј во Скопје ќе бидат изведени геофизички снимања на делови од локалитетот, наведуваат од Институтот за археолошки истражувања.