Аргентина ја девалвираше валутата, нагло ги зголеми каматните стапки

Аргентинската централна банка ја девалвираше својата валута, пезосот, за речиси 18 отсто и ја зголеми референтната каматна стапка за неверојатни 21 процентен поен на 118 отсто во понеделникот по шокантната победа на екстремно десничарскиот слободар Хавиер Милеи на прелиминарните избори.

Потезите беа обид на владата да ги смири пазарите по изненадувачката победа на аргентинскиот конгресмен, што му даде најголем дел од гласовите на прелиминарните претседателски избори во земјата од околу 30 отсто, што е далеку над предвидувањата.

Пазарите се обложуваа на поволни резултати за умерените кандидати. Претседателските избори во Аргентина ќе се одржат во октомври.

Во понеделникот паднаа и аргентинските акции и државните обврзници деноминирани во долари.

Централната банка во понеделникот соопшти дека пезосот ќе остане на 350 за долар до гласањето во октомври.

Милеи, јавајќи на бранот на народното незадоволство, вети дека ќе се ослободи од централната банка и ќе ја доларизира аргентинската економија. Тој, исто така, се залагаше за нагло намалување на трошоците.

Третата по големина економија во Латинска Америка, Аргентина со години е заглавена во економска и финансиска криза. Девизните резерви на земјата брзо се намалуваат, а инфлацијата годинава се прогнозира на 142,4 отсто, пренесува СЕЕбиз.

Аргентина е на работ на шестата рецесија за една деценија. Милеи е гласен критичар на она што тој го нарекува корумпирана политичка класа, велејќи дека лидерите на земјата ја втурнале земјата од една во друга криза. Тој смета дека замената на пезосот со долар може да ја смири инфлацијата, но многу економисти предупредуваат дека тоа ќе предизвика финансиски хаос.