Антидржавно однесување, електронски попис или бојкот

Најавата од ВМРО – ДПМНЕ за собирање потписи за поднесување закон за поништување на Законот за попис е крајно антидржавно однесување, изјави денеска пратеничката од СДСМ Марија Георгиевска.

Таа по барање на новинарите на денешната прес – конференција да ја коментира најавата од ВМРО-ДПМНЕ за собирање потписи за поништување на законот за попис и на прашањето дали можеби очекува бојкот на опозицијата и опструкција за спроведувањето на пописниот процес, нагласи дека оваа иницијатива односно овој начин на деструктивно однесување на ВМРО-ДПМНЕ околу собирањето на потписи, како што рече, и воедно повикувањето на бојкот на граѓаните за да го бојкотираат пописот е крајно антидржавно однесување.

– Се надеваме дека во наредниот период ќе ги преиспитаат своите одлуки околу собирањето на потписи заради тоа што деструктивното однесување и повикувањето за непочитување на законот за попис којшто е од исклучителна важност за нашата држава и за креирањето на понатамошните политики особено во однос на економијата, изјави на денешнта прес-конференција пратеничката од СДСМ Марија Георгиевска.

Од друга страна пак, ВМРО-ДПМНЕ тврди дека е за одржување попис којшто ќе има вистинска рефлекција за демографските состојби во нашава држава, изјави денеска пратеникот од оваа партија Тимчо Муцунски, кој повторно ги изнесе ставот на партијата дека овој попис е крајно е политизиран. Тој уште еднаш го повика претседателот Стево Пендаровски, пред да реши дали да го потпише указот за Законот за попис да се консултира со експерти.

Според него, овој попис се води по застарена методологија, за која тие сметаат дека не е усогласена со највисоките стандарди од ОН и ЕУ, односно стандардите на Евростат.

-Ние даваме конкретни предлози како може Македонија да направи електронски попис бидејќи имаме капацитет за тоа. Но очигледно немаше слух, рече Муцунски.

Тој прашува зошто е потребен двоен потпис за да се потврди една статистичка операција, велејќи дека очигледно има крајно политизирање на процесот.

-Во овие први моменти наша обврска е да се обидеме да ги искористиме сите институционални механизми да го спречиме овој попис. Кога ќе се искористат сите институционални механизми, тогаш партијата треба да разговара кои се следните чекори коишто треба да се преземат за да се спречи една ваква политичка, а не статистичка операција. Како пратеник комуницирам со многу граѓани, верувам дека тоа е и ставот на граѓаните. Сите сакаат попис, но никој не сака попис кој ќе го погази достоинството на нашиот уставно-правен систем. За жал во овој момент законот што го имаме во Собранието гледаме дека има тенденции кои не водат во таа насока, смета Муцунски.

Во врска со повикот на ВМРО-ДПМНЕ до претседателот на државата Стево Пендаровски да не го потпишува указот за Законот за попис, рече дека, според него, примарно најдобро е Пендаровски да се консултира со експерти од оваа област.

-Доколку се консултира со вистински и објективни експерти по ова прашање, верувам дека ќе го упатат кон тоа дека не е овој закон правилниот начин за спроведување попис. Ќе повторам – попис треба, попис треба час поскоро. Но, попис треба земајќи ги предвид современите алатки коишто ги имаме во 21 век. Треба електронски попис на Македонија, а Македонија има капацитет тоа да го направи и притоа нема никој да се сомнева во конечните статистики што ќе произлезат од него, рече Муцунски.