Англичаните повеќе нема да им препишуваат блокатори на пубертетот на децата

На децата повеќе нема да им се препишуваат рутински блокатори на пубертетот во клиниките за родов идентитет, потврди англиската Национална здравствена служба (NHS). Одлуката е донесена откако е утврдено дека нема „доволни докази“ дека блокаторите на пубертетот се безбедни или ефикасни.

Блокаторите на пубертетот, кои ги запираат физичките промени во пубертетот, сега ќе бидат достапни само како дел од клиничките испитувања. Д-р Хилари Кас објави извештај во 2022 година во кој се наведува дека има „празнини во доказите“ околу блокаторите на пубертетот и повика на трансформација на моделот на грижа за деца со тешкотии со родов идентитет.

Одржани и јавни консултации
Хормоните кои го потиснуваат пубертетот – попознати како блокатори на пубертетот – делуваат така што го потиснуваат ослободувањето на хормони кои предизвикуваат пубертет и често се препишуваат на деца кои се сомневаат во нивниот пол. Блокаторите на пубертетот ги запираат физичките промени како што е развојот на градите или влакната на лицето, пишува Би-би-си.

NHS досега им препиша блокатори на пубертет на помалку од 100 млади луѓе во Англија и сите ќе можат да продолжат со лекувањето. Минатата година NHS одржа јавна консултација за нивната употреба и воведе привремена политика дека тие треба да се даваат само како дел од истражувачки испитувања или во „исклучителни околности“.

„Отсекогаш бевме јасни дека безбедноста и благосостојбата на децата се најважни, затоа ја поздравуваме оваа важна одлука на NHS. Прекинувањето на рутинското препишување на блокатори на пубертетот ќе помогне да се осигураме дека грижата се заснова на докази, стручно клиничко проценување и во најдобар интерес на детето“, рече министерката за здравство Марија Колфилд.