Ангелов: Нема да нѐ изненади снегот, но возилата ни се стари

Снежните врнежи не треба да не изненадат во декември и јануари нормално е овие месеци да падне снег, вели директорот на ЦУК Стојанче Ангелов истакнувајќи дека вчера имало координативен состанок на субјектите кои се вклучени во системот за управување со кризи и таму било констатирано дека ЈП „Македонија пат“ има план за делување. Проблем, според него, може да претставува малиот број возила со кои за оваа намена располага јавното претпријатие.

– За жал од она што можевме вчера да го констатираме бројот на возила кој го поседува ЈП „Македонија пат“ не е доволен и тоа не е ново. Ваквата состојба трае не со години, туку со децении наназад. И покрај тоа што нема доволен број возила, дел од постоечките возила се доста застарени и често се случува додека интервенираат на патиштата да доаѓа до разни дефекти кои се отстрануваат на лице место, за да можат да продолжат со чистење, рече Ангелов.

-Ние како ЦУК  стоиме на располагање на граѓаните секогаш кога ќе има загрозување на нивниот живот здравје или материјални добра. Тие треба да го повикаат бројот 195, а ние во координација со полицијата, а по потреба и со Армијата ќе им помогнеме на сите на кои им треба помош, рече Ангелов.