Американската влада го тужи „Гугл“ за монопол на дигиталните реклами

Американското Министерството за правда и повеќе држави, вклучително Калифорнија, Њујорк, Колорадо и Вирџинија, поднесоа тужба против „Гугл“, тврдејќи дека незаконски го монополизирал пазарот за онлајн реклами преку долгогодишна практика на самозастапување, антиконкурентни аквизиции и принудување бизниси да користат повеќе производи и услуги што ги нуди, пишува американското издание на „Политико“.

Министерството за правда и државите го обвинуваат „Гугл“за незаконско монополизирање на американскиот пазар за дигитални реклами од околу 250 милијарди долари. Поднесокот го напаѓа однесувањето на „Гугл“ во услугите што ги продава на огласувачите и издавачите и се бара прекин на рекламниот бизнис на компанијата, заедно со неодредени штети кои директно влијаат на федералната влада. Кон тужбата се приклучија и државите Конектикат, Њу Џерси, Род Ајленд и Тенеси.

„’Гугл’ ја злоупотребува својата монополска моќ за да ги стави во неповолна положба издавачите на веб-локации и огласувачите кои се осмелуваат да користат конкурентни рекламни технолошки производи во потрага по поквалитетни или пониски трошоци“, се вели во поднесокот на Министерството за правда и државите. „’Гугл’ ја користи својата доминација над технологијата за дигитално рекламирање за да пренесе повеќе трансакции кон сопствените рекламни технолошки производи, каде што извлекува надуени трошоци за да ги наполни сопствените џебови на сметка на огласувачите и издавачите на кои наводно им служи“.

Тоа е првата голема антимонополска тужба против технолошка компанија во администрацијата на Џо Бајден, продолжувајќи ги напорите започнати во времето на поранешниот претседател Доналд Трамп.

„Денешната тужба од Министерството за правда се обидува да одреди победници и губитници во висококонкурентниот технолошки сектор за рекламирање“, рече портпаролот на „Гугл“, Питер Шотенфелс. „Тоа во голема мера ја удвојува неоснованата тужба на државниот обвинител на Тексас, од која голем дел неодамна беше отфрлен од федералниот суд“.

Прогресивците го поздравија случајот. „Како што детално ги документира тужбата на Министерството за правда, ‘Гугл’ е купувач, брокер и дигитална размена на реклами со широко распространети судири на интереси“, рече Мет Столер од проектот за Американски економски слободи за „Политико“. „’Гугл’ редовно ја злоупотребува оваа моќ, манипулирајќи со пазарите, отстранувајќи каква било форма на конкуренција и инспирира страв низ комерцијалниот пејзаж“.

Поддржувачите на „Гугл“ го нарекоа случајот погрешен. „Уделот на пазарот на реклами на ‘Гугл’ сега е на ниско ниво и самиот отпушти 12.000 вработени среде опаѓање на пазарот за рекламирање – така што овој случај на Министерството за правда сам се исклучува од економската реалност“, рече Адам Ковачевич, извршен директор на технолошки финансираната Комора на напредок. „Додека технолошкиот сектор и рекламната индустрија намалуваат работни места, администрацијата на Бајден треба да бара начини за поддршка на овие сектори, наместо да го поткопа она што останува“.