Амбасадорот на ЕУ во Судан нападнат во неговата резиденција

Амбасадорот на Европската унија во Судан беше нападнат во понеделникот „во сопствената резиденција“, според највисокиот дипломат на блокот Жозеп Борел, додека трае борбата меѓу ривалските воени фракции.

„Ова претставува грубо кршење на Виенската конвенција [sic]. Безбедноста на дипломатските простории и персоналот е примарна одговорност на суданските власти и обврска според меѓународното право“, напиша Борел на Твитер. Борел не го именуваше амбасадорот, но портпаролот на Европската служба за надворешни работи потврди дека станува збор за Ејден О’Хара од Ирска.

Портпаролот рече дека амбасадорот „е во ред“ и „ние сме во контакт со него“, додавајќи дека „тој продолжува со своите должности“.

„На цивилите во Судан итно им е потребен прекин на огнот за да бидат безбедни и да овозможат простор за посредување. ЕУ работи на тоа да ја убеди секоја страна да размисли за хуманитарна пауза и да поттикне дијалог“, напиша Борел на Твитер.

Ирскиот министер за надворешни работи Михол Мартин изјави дека е „длабоко загрижен поради сериозниот инцидент во Картум денеска“, но додаде дека О’Хара „не е сериозно повреден“, според „Ајриш тајмс“.

Насилството избувна во текот на викендот меѓу армиските единици лојални на генералот Абдел Фатах ал-Бурхан, шеф на преодниот владејачки суверен совет на Судан, и паравоените сили за брза поддршка (РСФ), предводени од генералот Мохамед Хамдан Дагало. Двете страни некогаш беа сојузници по пучот во 2021 година и соборувањето на лидерот Омар Башир во 2019 година, но несогласувањето ескалира околу интегрирањето на РСФ во вооружените сили според меѓународно поддржан транзициски план, покрај другите фактори.

Повеќе од 180 луѓе се убиени, а 1.800 се повредени од саботата, според претставникот на ОН, Фолкер Пертес.