Алтернатива одлучи: Сали на местото на Филипче, Исмаили за потпретседател на Собранието
За нов министер за здравство во идната коалициска влада во која ќе учествува и Алтернатива, ќе биде предложен генералниот секретар на партијата и кандидат за градоначалник на Чаир на последните локални избори, Баким Сали. Хусни Исмаили, пак, ќе биде предложен за потпретседател на Собранието, беше одлучено вечерва на седница на централното претседателство на Алтернатива на која беа утврдени и предлозите за други функционери во новата влада што се очекува да ја предводи новиот претседател на СДСМ Димитар Ковачевски.
Адмирим Алити е предлогот на Алтернатива за министер за информатичко општество и администрација, а Џемаил Чупи за министер без ресор задолжен за дијаспората. Партискиот порпарол, Орхан Муртезани, пак, ќе биде предлогот за нов директор на МЕПСО.
„Централното претседателство дискутираше за начелата на квалитетното претставување на Алтернатива, избирајќи ги најдобрите и најквалитетни кадри кои ги има партијата. По плодна и аргументирана дебата, претседателот Африм Гаши ги предложи носителите на јавните функции, а Централното претседателство на Алтернатива го прифати неговиот предлог“, соопштија од партијата.
Меѓу предложените имиња се и Лулзим Алиу за заменик министер за образование и наука, Абдулшиќир Абедини за заменик министер за земјоделство, Даим Лучи за заменик министер за култура, Амир Елези за директор на Клиничката болница во Тетово, Дритан Беџети за директор на ПИОМ, Мубекир Палоши за директор во АД „Железници – Транспорт“, Блерим Абази за директор на Управа за водење на матични книги, а Беким Емини за директор на Агенција за странски инвестиции.
Од Алтернатива посочуваат дека вечерва биле избрани и носителите на некои други јавни институции, но тие ќе бидат објавени дополнително.