Алиби играта во вториот дел ја однесе Македонија во пораз против Украина

Македонија загуби уште еден меч според шаблонот што сме го гледале многу пати на градскиот стадион во Скопје. Фудбалерите и стручниот штаб помислија дека предноста од 2:0 на полувремето во натпреварот со Украина помислија дека веројатно се доволно и имаат доволно умешност да ги зачуваат во вториот дел, но тоа беше лажна погрешна пресметка, како што се испостави на крајот. 

Украина ја победи Македонија со 3:2 со три гола постигнати во второт полувреме, откако македонските фудбалери им препуштија сѐ на Украинците – и теренот, и играта, и амбицијата за гол, и енергичноста во дуелите.

Тоа се виде уште во првите минути на второто полувреме кога македонските фудбалери се откажаа од намерата да играат како што го правеа тоа во првиот дел – полетно, ангажирано и енергично и доминираа на теренот. Обидите да се контролира резултатот со пас игра околу средината на теренот, со минимална желба да се оди кон украинскиот гол мнопгу брзо се покажаа јалови и недобро осмислени. Според она што изгледаше на теренот, Украинците брзо сфатија дека нивните домаќини се подготвени да се заклучат на својата половина и да се обидат да го чуваат резултатот. И ја презедоа иницијативата, сфаќајќи дека домаќините сами им го понудија теренот и играта.

И брзо стигнаа два гола, а подоцна и третиот. Во меѓувреме и Висар Муслиу го доби вториот жолт картон, па македонија со 10 играчи и мала амбиција речиси и да немаше шанса.

А првото полувреме беше сосема друга приказна – македонските фудбалери знаеја што сакаат во играта, знаеја како да ги комбинираат акциите, Украинците беа речиси невидливи. Прво Барди даде гол од пенал, а потоа Елмас со еден чудесен шут го цементираше водството од 2:0. Потоа и Алиоски имаше извонреден слободен удар.

Второто полувреме донесе потоп со головите на Забрни, Конопља и Циганков. Уште по првиот погодок на Украинците се гледаше дека Македонците го изгубија ритамот, играта стануваше конфузна, а се гледаше и стравот дека се можни уште голови на противникот. И така и се случи.

Со ваква игра како од второто полувреме навивачите со право уште денес стравуваат како ќе изгледа мечот со Англија во среда во Манчестер. Штета, беспотребно дадена победа. Најмногу поради лошата тактика и уверението дека може да се сочува водството со алиби игра. (Н.В.)