Алармантни бројки од ЕУ: Случаите на сексуално насилство и силување се во пораст

Бројот на пријавени случаи на сексуално насилство во Европската Унија е во пораст, додека европските институции истовремено дискутираат за воведување на единствена дефиниција за силување врз основа на согласност.

Бројот на пријавени случаи на силување и сексуално насилство во Европската Унија се зголемува во време кога Унијата се обидува да воведе дефиниција за силување врз основа на согласност, пишува Euronews.

Полицијата регистрирала повеќе од 256.000 кривични дела поврзани со сексуално насилство во ЕУ во 2024 година, од кои 38 проценти биле силување, според најновите податоци на Евростат.

Во споредба со 2023 година, бројот на кривични дела поврзани со сексуално насилство се зголемил за 5 проценти, додека бројот на силувања се зголемил за 7 проценти.

Најголем број пријави е забележан во Франција, Германија и Шведска, додека Кипар, Малта и Литванија имале најмалку пријавени случаи.

Експертите предупредуваат дека зголемувањето на пријавите може да значи и поголема свест и подобрени механизми за пријавување, а не нужно вистинско зголемување на насилството.

Податоците беа објавени кратко откако Европскиот парламент поддржа заедничка дефиниција за силување врз основа на согласност, позната како „да значи да“.

Пратениците нагласија дека согласноста мора да се оценува во контекст, вклучувајќи случаи на насилство, злоупотреба на моќ, заплашување или ранливост на жртвата, и повикаа на подобра заштита и поддршка за жртвите низ цела ЕУ.

Иако ЕУ усвои минимални стандарди за борба против насилството врз жените за прв пат во 2024 година, предлогот за заедничка дефиниција за силување беше отфрлен во тоа време поради противењето од некои земји-членки.

Долгорочниот тренд, исто така, покажува зголемување, според податоците: помеѓу 2014 и 2024 година, бројот на злосторства од сексуално насилство се зголемил за 94%, а силувањето за 150%.

Во исто време, законодавството варира меѓу земјите-членки, иако повеќето ја следат рамката на Истанбулската конвенција на Советот на Европа.