Ако биде избран Трамп нема да даде ниту цент за Украина, вели Орбан

Поранешниот американски лидер Доналд Трамп нема да даде пари за да ѝ помогне на Украина во борбата против Русија, ако повторно ја добие претседателската функција и тоа ќе го забрза крајот на војната, рече унгарскиот премиер Виктор Орбан во неделата (10 март) по средбата со него.

Националистичкиот премиер Орбан, кој ја поддржува желбата на својот долгогодишен сојузник да се врати во Белата куќа, се сретна со Трамп во петокот на Флорида.

„Тој нема да даде ниту цент во војната Украина-Русија и затоа војната ќе заврши“, изјави Орбан за државната телевизија доцна во неделата. „Очигледно е дека Украина сама не може да стои на нозе“.

„Ако Американците не дадат пари и оружје, а исто така и Европејците, тогаш оваа војна ќе заврши. И ако Американците не дадат пари, Европејците не можат сами да ја финансираат оваа војна и тогаш војната ќе заврши“.

Орбан одби да испрати оружје во Киев и одржуваше блиски економски врски со Москва откако руските сили ја нападнаа Украина во 2022 година. Последен пат се сретна со рускиот претседател Владимир Путин во октомври во Кина и покрај напорите на Европската унија да ја изолира Москва.

Орбан рече дека е „друга работа“ како војната ќе се затвори со мировни преговори по примирјето и како ќе се создаде стабилна и безбедна Европа, но прво мора да се постигне мир и „тој (Трамп) има средства за тоа“. (Ројтерс)