Србија пред неизвесна ноќ, „Ќациленд“ се полни со мажи облечени во црно

„Ќациленд“ се полни со мажи облечени во црно, со ранци на грбот, јавуваат репортерите на неделникот „Време“. Тие се распоредуваат од двете страни на улицата „Крал Милан“, каде што ја обезбедуваат зградата на Републичката изборна комисија, како и пред Народното собрание.

Во Пионирскиот парк во центарот на Белград, пред затворањето на избирачките места на вонредните парламентарни избори во Србија,  почна поставување шатори и придружна инфраструктура. Во исто време, засилено е полициското присуство околу паркот, а полициските сили се распоредени со целосна опрема за интервенции при демонстрации.

Сопствениците на угостителски и други деловни објекти во центарот на Белград почнаа да поставуваат дрвени заштитни плочи врз излозите, додека во Србија се одржуваат вонредните парламентарни избори, проследени со зголемено полициско присуство и пријави за инциденти.

Како што пренесува порталот „Нова.рс“, повикувајќи се на телевизијата Н1, сопствениците на локалите на улицата „Крал Милан“, во непосредна близина на Републичката изборна комисија и Претседателството на Србија, ги обезбедуваат стаклените излози со дрвени заштити.

Ваквите сцени се забележани во момент кога во центарот на Белград се распоредени голем број полициски сили, а пристапот до зградата на Републичката изборна комисија е блокиран со полициски огради.

Во меѓувреме, инциденти се пријавуваат и во други делови на Србија. Во Качарево, кај Панчево, граѓани опколиле ресторан во кој се наоѓала група од околу 30 мажи, за кои мештаните тврдат дека претходно предизвикале инцидент во Земјоделското училиште во Панчево. На местото пристигнала и полициска интервентна единица, која, според тврдењата на граѓаните, била ангажирана за смирување на ситуацијата и спречување нови инциденти.

„Редиците пред избирачките места се толку долги, а до пладне излезноста веќе достигна околу 35 отсто – може слободно да се каже дека со Александар Вучиќ е готово“, вели Жарко Кораќ, пензиониран професор од Универзитетот во Белград, кој беше потпретседател на владата на Зоран Ѓинѓиќ.

Фактот што многу од неговите медиуми – како „Информер“, „Курир“, „Ало“, „Политика“ и „Б92“ – известуваат за бројни нерегуларности на избирачките места и закани упатени кон гласачите кои го поддржуваат Вучиќ, а истовремено ги обвинуваат студентите и независните медиуми за прекршување на предизборниот „молк“, сугерира дека можеби веќе се подготвува стратегија за отфрлање на изборните резултати – под изговор дека се „нерегуларни“. „Информер“, како најсилното медиумско оружје на Вучиќ, веќе зборува за овие нерегуларности, што значи дека тие се свесни во која насока се движи изборниот процес.

Дури и во „најдобрите“ денови на Александар Вучиќ, за него гласале околу два милиона луѓе, што значи дека овој пат му се потребни најмалку уште 400 до 500 илјади гласови за да прогласи победа. Доколку излезноста се движи меѓу 65 и 70 отсто или повеќе – што се очекува според овој тренд – тоа ќе значи дека тие нема да можат да ја надоместат разликата.

Според одредени информации, во случај на пораз, тој би можел да предизвика немири и безредија за да прогласи вонредна состојба и на тој начин, барем привремено, да го одложи својот пад. Можеби ќе инсистираат на нерегуларности на изборите или на сопствена победа – која студентите не ја признаваат – со што дополнително ќе ја усложнат ситуацијата и ќе ја доведат до работ на криза и хаос, оценува „Јутарњи лист“.

Се поставува прашањето до кој степен полицијата, војската и разузнавачките служби, како и неговите паравоени формации – таканаречените „ќаци“ – се подготвени да го бранат, иако тие всушност во голема мера се бранат себеси и сопствените позиции.

Според медиумот,  доколку Вучиќ  прогласи победа и покрај толку високата излезност, тоа ќе значи дека станува збор за сериозна изборна измама. Тоа несомнено ќе изведе голем број незадоволни граѓани – односно оние што не гласале за него – на улиците, особено во големите урбани центри како Белград, Нови Сад и Ниш.  Можеби и ќе го признае поразот, но ќе стори сè за да ја отежне промената на власта.