Том Круз ќе добие награда за животно дело од Американскиот филмски институт

Лос Анџелес – Американскиот филмски институт (АФИ) ќе му ја додели „Наградата за животно дело“ на Том Круз, соопшти Управниот одбор на Институтот. Наградата ќе биде врачена на свеченост којашто ќе се одржи во Театарот „Долби“ во Лос Анџелес, на 24 април следната 2027 година.

– Том Круз е глобална икона!, изјави Кејтлин Кенеди, претседателка на Управниот одбор на АФИ, истакнувајќи ја посветеноста на глумецот и како продуцент, како и неговата верба во моќта на филмот да ги обединува луѓето.

Том Круз (64) е активен во филмската индустрија повеќе од 40 години, играјќи главни улоги во остварувања како „Ризичен бизнис“ (Risky Business), „Неколку добри луѓе“ (A Few Good Men), „Очи широко затворени“ (Eyes Wide Shut), „Коктел (Cocktail)”, „Малцински извештај“ (Minority Report) и веќе култниот серијал „Невозможна мисија“ (Mission: Impossible). Тој има и три номинации за „Оскар“ за глума – за најдобра главна улога за филмовите „Роден на четврти јули“ (Born on the Fourth of July) и „Џери Магваер“ (Jerry Maguire), како и за споредна улога за „Магнолија“ (Magnolia). Како продуцент, Круз беше имаше можност за „Оскар“ кога „Топ Ган: Маверик“ (Top Gun: Maverick) доби номинација за најдобар филм.

Круз лани доби почесен „Оскар“ на свеченоста на „Гувернерските награди (Governors Awards)“, на американската Академија за филмски уметности и науки.

„Наградата за животно дело“ на АФИ, востановена 1973 година, им оддава признание на поединци чија работа придонела за напредокот на филмот и го издржала тестот на времето. Круз ќе се приклучи на списокот добитници во којшто, меѓу другите, се наоѓаат Џон Форд, Бет Дејвис, Сидни Поатје, Стивен Спилберг, Дензел Вашингтон, Никол Кидман и – Еди Марфи кој ова признание го доби претходно оваа година.