Администрацијата на Трамп бара од Врховниот суд да дозволи изградба на граничен ѕид во западен Тексас

Администрацијата на американскиот претседател Доналд Трамп побара од Врховниот суд на САД да ѝ дозволи продолжување на планот за изградба на граничен ѕид меѓу САД и Мексико во зафрленото подрачје на западен Тексас, кое го опфаќа и националниот парк Биг Бенд.

Министерството за правда поднесе итно барање до судот да го укине налогот на сојузната судијка со кој беше запрена изградбата на ѕидот во тој регион додека трае судската постапка што против проектот ја покренаа еколошка организација и други оспорувачи.

Трамп веќе долго време ја истакнува изградбата или зајакнувањето на бариерите долж американско-мексиканската граница како едно од главните обележја на својата анти-миграциска политика. Сепак, настојувањата на неговата администрација да ја прошири граничната инфраструктура на подрачјето на националниот парк, околу 400 километри југоисточно од Ел Пасо, наидоа на отпор од локалните официјални лица, заштитниците на природата и дел од тексашките републиканци.

Тужителите оспорија низа изземања од законските одредби кои ги издаде американското Министерство за внатрешна безбедност за да ја забрза изградбата на патишта и бариери во регионот Биг Бенд, заобиколувајќи ја притоа примената на различни закони за заштита на животната средина и природата.

Поранешната министерка за внатрешна безбедност Кристи Ноем и сегашниот министер Марквејн Малин, кои ги издадоа изземањата меѓу февруари и јули, оценија дека станува збор за „подрачје со висок степен на нелегални влезови“, што бара дополнителни бариери за контрола на границата.