Се шири видео старо 10 години: Пророчките зборови на Хилари Клинтон за Трамп и Путин

„Ќе видиме дали марионетата на Путин ќе продолжи да танцува по неговата музика“, му реше клинтон на Трамп во нивната дебата од претседателската кампања

Видео клип од соочувањето меѓу Хилари Клинтон и Доналд Трамп од претседателската кампања во 2016 година, кој го објави самата поранешна државна секретарка на САД и претседателски кандидат на својот Фејсбук профил, масовно се шири на социјалните мрежи. За краток временски период, видеото собра речиси 50.000 лајкови, повеќе од 7.000 споделувања и 4.000 коментари во кои корисниците претежно ја повторуваат истата порака: „Таа нè предупреди, беше апсолутно во право“.

Клинтон го објави видеото десет години по нивната дебата, потсетувајќи на драматичниот пресврт што Доналд Трамп го направи во последните денови во корист на Кремљ.

„Точно пред десет години на денешен ден“, напиша Клинтон. „Само во последните неколку дена: Трамп постигна договор САД да купат руски дизел, економски спас за Путин; тој и Илон Маск се обвинуваат меѓусебно за наредбата за забавување на сателитската врска Старлинк над Украина, ослабувајќи ја одбраната на таа земја за време на катастрофалниот руски напад; а Трамп, исто така, ги укина санкциите кон Русија што ги протурка Конгресот, предводен од неговиот покоен пријател Линдзи Греам“.

„Сега Путин предложи самит со Трамп и Ши за да се одлучи судбината на Украина наместо таа самата, да се урне еден век меѓународна соработка и да се прикаже Русија како рамноправна со САД и Кина. Ќе видиме дали марионетата на Путин ќе продолжи да танцува како што тој свири“, заклучи Клинтон во својот пост.

Клипот од претседателската дебата од октомври 2016 година ја долови една од најпознатите дебати за Владимир Путин во историјата на американските избори. Еве го транскриптот од клипот.

Трамп: „Од она што можам да видам, Путин нема ни малку почитување кон оваа личност“.

Клинтон: „Па, тоа е затоа што тој би сакал да има марионет на чело на Соединетите Американски Држави“.

Трамп: „Јас не сум марионета, јас не сум марионета!“

Клинтон: „И тоа е прилично јасно…“

Трамп: „Вие сте марионета!“

Клинтон: „Прилично е јасно дека не сакате да признаете дека Русите ги хакирале САД, дека охрабрувавте шпионажа против нашите граѓани, дека сте подготвени да ја повторите приказната на Путин, да ја исполните неговата листа на желби, да го распаднете НАТО и да правите што сака, и дека продолжувате да ја добивате неговата помош затоа што тој има многу јасен фаворит во оваа трка“.

Гледано од перспектива на денешните настани – укинувањето на санкциите на Трамп против Москва, увозот на руски дизел, отворениот притисок врз Киев да се предаде и плановите на Путин за прекројување на границите со Трамп и Пекинг – зборовите на Хилари Клинтон изговорени пред цела деценија звучат речиси пророчки.