Страшни слики од Сплит: Се извикуваше „Стани Адолфе“, „Ана Франк е еврејска ку..а“

Вчера во Сплит, пред натпреварот помеѓу Хајдук и Ајакс на стадионот „Пољуд“, членови на навивачката група „Торцида“ се впуштија во нацистички и антисемитски испади какви што не се слушнати не само во Хрватска, туку и во целиот регион. За време на организираниот марш кон стадионот, од толпата можеа да се слушнат извици како: „Аушвиц, Аушвиц“, „Гази ги, гази ги, гази ги Евреите“, „Стани, Адолфе“ и „Ајде, ајде, усташи“. Исто така, пееја: „Ги потпалувам високите печки – два реда кокс, четворица Евреи. Евреинот вреска ’ааа‘ – ќе има печење, колку сум среќен“.

Во јавноста кружи видео на кое се гледаат членови на „Торцида“ како пеат навредлива песна за Ана Франк – еврејска жртва на Холокаустот, која починала во нацистички концентрационен логор на само 15-годишна возраст.

„Ана Франк, Ана Франк, таа не е светица. Таа е, таа е еврејска курва“, пееја членовите на „Торцида“.

Сето ова се случи во самиот центар на Сплит, пред очите на бројни граѓани и полициски службеници – при што полицијата претходно распореди дополнителни сили поради низа инциденти поврзани со навивачи во текот на изминатите денови. Полицијата потврди дека за време на маршот биле забележани извици што содржат елементи на казниво однесување и започна кривична истрага за да се идентификуваат сторителите и да се изведат пред лицето на правдата.

Мртовечки ковчег за „Ајакс“ на жолт „голф“

Поворката ја предводеше жолт автомобил „голф“ со ковчег на покривот, на кој стоеше натписот „Ајакс“. Навивачите на „Торцида“ подоцна го симнаа ковчегот и го уништија, притоа извикувајќи пароли против Евреите.

Полицијата започна и кривична истрага за да се идентификуваат одговорните лица. Утринава започнаа апсења и кривична обработка на поединци осомничени за учество во извикувањето на нацистички и антисемитски пароли.

Претседателот на Хрватска, Зоран Милановиќ, издаде соопштение во кое го осудува однесувањето на дел од навивачите на „Торцида“.

„Однесувањето на еден дел од навивачите на ’Торцида‘ во Сплит е неприфатливо, срамно и заслужува целосна осуда. Скандирањата и постапките што отворено ги величаат нацистичкиот и усташкиот режим бараат итна и системска реакција од хрватската полиција, Државното обвинителство и, на крајот, од судовите. Ги повикувам сите надлежни институции со најголема сериозност да пристапат кон истрагата за овој срамен инцидент, за да се осигураат дека вакво нешто никогаш повеќе нема да се повтори“, изјави тој.

„Зборовите на осуда, какви што слушаме од Владата, веќе не се доволни; потребни се мерки и санкции за да се покаже дека во Хрватска нема место за величање на нацизмот или на усташкиот режим. Навивачите кои го сакаат и почитуваат својот фудбалски клуб не смеат да бидат заложници на малцинството кое носи срам не само за ’Торцида‘ и ’Хајдук‘, туку и за цела Хрватска“, заклучи претседателот.

Владата синоќа издаде соопштение во кое ги осуди скандирањата со кои се велича нацистичкиот режим, а кои беа забележани за време на маршот на група навивачи пред натпреварот.

„Остро ги осудуваме неприфатливите скандирања со кои се велича нацистичкиот режим, а кои беа забележани за време на маршот на дел од навивачите пред денешниот натпревар во Сплит. Полицијата спроведува кривична истрага со цел да ги идентификува и процесуира оние што ги извикувале овие казниви пароли за време на маршот. Ваквото срамно однесување претставува негација на спортот и на демократските вредности што ги застапува современа Хрватска“, наведоа од Владата.

Опозициските пратеници го осудија дивеењето на „Торцида“ во Сплит; партиите СДП и „Можеме!“ предупредија на ширењето на фашизмот и антисемитизмот, повикувајќи на казнување на одговорните.

Арсен Баук (СДП) изјави дека однесувањето на „Торцида“ не е изолиран инцидент, туку продолжение на систематски обид да се поместат границите на она што се смета за прифатливо во однос на фашизмот во хрватското општество – процес што вклучува релативизирање на усташкиот поздрав „За дом спремни“ и претставување на усташката симболика како израз на патриотизам.

„А од не толку славната историја знаеме дека, по Јуре и Бобан, логичниот следен чекор се Хитлер и гасните комори“, истакна тој. Иако Баук ги поздрави осудите за инцидентот – придружувајќи им се и самиот – тој ги оцени таквите реакции како лицемерни кога доаѓаат од оние кои, според него, придонеле за нормализирање на оваа идеологија.