Дронови нападнаа бродови во близина на Бугарија; еден е потопен

Два брода беа нападнати од дронови во близина на бугарскиот брег на Црното Море, а еден од нив потона. Премиерот Румен Радев ја потврди веста, истакнувајќи дека ова е втор таков инцидент во изминатата недела.

Бродот „Челзи 3“, кој плови под малтешко знаме и е во сопственост на украинска компанија, беше погоден од три дрона околу 1,30 часот по полноќ. Нападот се случи на приближно 18 наутички милји – или 33 километри – од бугарскиот брег.

Екипажот се состоеше од седум Украинци и осум Азербејџанци. Сите беа спасени; пет члена на екипажот добија медицинска помош, но никој не се здоби со сериозни повреди.

Вториот нападнат брод беше идентификуван како „Азов конкорд“. Тој потона на околу 31 километар источно од Крапец. Досега е спасен еден член на екипажот, додека вкупниот број на луѓе на бродот и судбината на останатите остануваат непознати.

„Ова е целосно неприфатливо – уште еден напад во непосредна близина на бугарските територијални води“, изјави Радев во телевизиско обраќање. Тој најави планови да разговара за инцидентот со генералниот секретар на НАТО, Марк Руте.

Премиерот истакна дека нема јасни докази за тоа кој го извршил нападот, но додаде дека сите индиции укажуваат на Русија. Поради овој настан, тој ја повика руската амбасадорка Елеонора Митрофанова на разговор. За инцидентите се известени и постојаните претставници на Бугарија во НАТО и во Европската унија. Бугарија не граничи со Украина или Русија, но како членка на НАТО зазема стратешка позиција на Црното Море, каде што и двете завојувани страни имаат важни пристаништа. Растат загриженоста и стравувањата од можни хибридни напади со дронови што ги спроведува Русија паралелно со војната во Украина.

Бугарија нема цврсти докази за потеклото на дроновите користени во нападите; сепак, спротивно на логиката е Украина да ги уништува сопствените бродови во Црното Море, додека резултатите од овие напади ѝ одат во прилог на Русија. Премиерот Румен Радев ѝ го пренесе ова на Елеонора Митрофанова, амбасадорката на Руската Федерација во Бугарија, за време на средбата владата.

Митрофанова изјави дека ја разбира оваа логика, но дека нема информации од руското Министерство за одбрана во врска со неодамнешните напади врз трговските бродови во Црното Море. Таа додаде дека не ја исклучува можноста овие напади врз трговски бродови во близина на бугарските територијални води да претставуваат провокација од трета страна.

Малку е веројатно дека Бугарија ќе именува конкретна држава како сторител, рече Радев, бидејќи за тоа е потребно да се пронајдат остатоци од дроновите – што досега не е направено.

Премиерот Радев ѝ рече на Митрофанова дека нападите врз трговските бродови во Црното Море се апсолутно неприфатливи и доведуваат до значителна ескалација на конфликтот. Бугарија ќе продолжи да ги истражува нападите заедно со своите сојузници од ЕУ и НАТО за да се утврди вистината, додаде тој, според соопштението на прес-службата на владата.

„Иако не е страна во војната, Бугарија трпи значителни економски и финансиски загуби. Нападите во Црното Море веќе доведоа до зголемени ризици за комерцијалната пловидба, повисоки трошоци за осигурување, па дури и до одбивање за транспорт на товар до бугарските пристаништа. Ова исто така ги зголемува трошоците и го загрозува снабдувањето со нафта за рафинеријата во Бургас“, изјави бугарскиот премиер.

Слични напади се случија на 6 октомври, кога дронови погодија два трговски брода во исклучивата економска зона на Бугарија во Црното Море, на околу 130 километри од брегот. Бродот „Алфа ватан“, кој пловеше под знамето на Того, потона, а десет члена на неговиот екипаж се водат како исчезнати. Уште еден брод, „Ејбл“, кој плови под знамето на Палау, се запали по нападот. Сите 18 членови на екипажот беа спасени, а двајца се сериозно повредени. Еден ден претходно, во близина на Романија беше нападнат и товарен брод во турска сопственост, при што загинаа двајца членови на екипажот.

По нападот, Бугарија побара помош од Европската унија и од НАТО во истрагата. Претседателот Румен Радев ги осуди нападите врз цивилните бродови и предупреди на зголемените безбедносни ризици во Црното Море.

Украинскиот претседател Володимир Зеленски ја обвини Русија за нападите, но одговорноста не е независно потврдена. Претседателката на Европската комисија, Урсула фон дер Лајен, и претседателот на Европскиот совет, Антонио Кошта, денес ги осудија нападите врз бродовите во Црното Море и изразија солидарност со Бугарија.

„Црното Море стана уште една сцена за ескалација на руската војна во Украина. Ова е неприфатливо“, објави Урсула фон дер Лајен на Икс.

Антонио Кошта објави дека лидерите на ЕУ, кои се состануваат задутре и петок во Брисел, ќе разговараат за оваа ситуација и за интензивирањето на руските хибридни активности.