Обид за нов рекорд во пештерата Врело: Спелеонуркачи ќе истражуваат длабочини над 300 метри

 Во подводната пештера Врело во кањонот Матка во тек е спелеонуркачка експедиција чија цел е да се надмине досегашниот рекорд од 287 метри и да се истражат длабочини од 300 метри или повеќе во еден од најдлабоките подводни пештерски системи во Европа и светот.

Од Спелеонуркачкиот клуб „Врело“ информираат дека експедицијата се реализира од 10 до 17 октомври и претставува обид за понатамошно истражување на подводниот систем на пештерата.

Пештерата Врело досега беше предмет на повеќе значајни истражувања. Италијанскиот нуркач Луиџи Касати достигна длабочина од 212 метри, полскиот спелеонуркач Кшиштоф Старнавски 242 метри, додека во 2025 година полскиот нуркач Бартломиеј Питала со својот тим достигна 287 метри со кои пештерата во моментов е рангирана како трета најдлабоко истражена подводна пештера во светот, по Фонт Естрамар во Франција (312 метри) и Елефанте Бјанко во Италија (292 метри).

Експедицијата „Врело 2026“ се одржува под генерално покровителство на претседателката Гордана Силјановска-Давкова. Поддршка на терен обезбедуваат припадници на Специјалната антитерористичка единица „Тигар“ при Министерството за внатрешни работи, а во приправност се и хеликоптерската единица на МВР, службите за итна медицинска помош и Црвениот крст. Во подготовките учествувале и единици на Генералштабот на Армијата.