И БиХ привремено ја запира употребата на бугарската БСЖ вакцина

Одделението за јавно здравје при Владата на Дистриктот Брчко, Босна и Херцеговина, препорача привремено запирање на употребата на BCG-вакцината произведена од компанијата „BB-NCIPD Ltd.“ (Бугарија) како мерка на претпазливост, сè додека не се добијат дополнителни информации и проценка од надлежните органи.

Оваа препорака уследи по одлуката на Хрватската агенција за лекови и медицински средства (HALMED) да ја запре дистрибуцијата и употребата на оваа вакцина во Хрватска, поради пријави за сомнителни несакани реакции.

Одделението за јавно здравје наведува дека досега во Дистриктот Брчко не се пријавени сериозни несакани реакции по примената на оваа вакцина.

Според податоците на Агенцијата за лекови и медицински средства на БиХ, во периодот од 2020 година до денес, на територијата на Босна и Херцеговина не се пријавени сомнителни несакани реакции поврзани со оваа BCG-вакцина.

BCG-вакцината се дава по раѓањето и штити од најтешките форми на туберкулоза, вклучувајќи го туберкулозниот менингитис и дисеминираната туберкулоза.

Одделението напоменува дека остеитисот или остеомиелитисот поврзан со BCG-вакцината претставува многу ретка компликација, која може да се појави во период од неколку месеци до неколку години по вакцинацијата. Најчестите симптоми вклучуваат упорен оток во пределот на коска или зглоб, болка и осетливост на допир, ограничена подвижност, куцање или избегнување на оптоварување на засегнатата рака или нога.

За децата без симптоми не се потребни посебни мерки; сепак, се препорачува консултација со лекар доколку се појави кој било од гореспоменатите симптоми.