34 секунди од Дневникот на РТС што го налутија Вучиќ

На 21 ноември, вториот Дневник на РТС наместо во 19 часот и 30 минути, почна во 17,15 часот поради кошаркарскиот натпревар Данска – Србија. Пет минути подоцна во студиото беше и претседателот Александар Вучиќ. Тонот на неговото гостување беше одбележан со критики и обвинувања кон РТС поради вестите од 34 секунди, иако на претседателот му се чинеше дека тоа трае две минути. Заради тие 34 секунди изгледа ниту видел ниту слушнал што претходно било емитувано, па јавниот сервис неправедно обвини дека така почнал нивниот Дневник и дека се „уште полоши од Н1“.

Дневникот на РТС на 21 ноември почна со веста за апсењата поради падот на настрешницата на железничката станица во Нови Сад, кога загинаа 14 лица, а уште едно лице подоцна почина во болница.

Севкупно, веста и извештајот за апсењето траеја две минути, колку што требаше да се прочитаат имињата на четворицата уапсени функционери, дел од соопштението на Вишото јавно обвинителство во Нови Сад, како и да се пренесе изјавата на министерот за внатрешни работи Ивица Дачиќ, пишува Н1.

Потоа следеше извештај за здравствената состојба на повредените при уривање на настрешницата. На крајот од тој блок, во 17 часот 19 минути и 32 секунди, водителот на Дневник објави три вести за 34 секунди – дека пратениците и активистите на опозицијата го блокирале обвинителството и судот во Нови Сад, дека активистите во Белград ги блокираат работите на Стариот савски мост и дека дел од студентите на Филозофскиот и политички науки ја прекинаа наставата 15 минути во знак на солидарност со 15-те жртви во Нови Сад.

Во тие неколку реченици изговорени во 34 секунди, на граѓаните на Србија им блесна пред очи сликата на незадоволство што се шири низ државата. Доволно за претседателот да испорача канонада од незадоволство од уредувачката политика на РТС.

Запрашан за апсењата на осомничените за несреќата во Нови Сад и дали апсењата се резултат на притисокот врз обвинителството и блокадите што се случија претходните денови, Вучиќ рече дека главниот виновник е јавниот сервис.

„Тој притисок најмногу го вршеше РТС, многу повеќе од нив, ‘сестринската’ телевизија Н1 и Нова С. Во првите две минути на Дневник споменавте три собири на кои во просек имаше по 45 присутни. Собири пред Факултетот за политички науки, Филозофски, Савскиот мост, а некаде на друго место имаше некој бесмислен собир во Нови Сад на насилници и силеџии. Имаше вкупно 180 луѓе. Тие не предизвикуваат никаков ефект освен што имаат групи за притисок во кои е вклучена и РТС заедно со нејзините сестрински телевизии и овие групи за притисок сакаат да создадат впечаток дека во земјата има вонредна состојба“, им рече претседателот на водителите.

Кога објаснуваше што не објавила РТС, а водителката се обиде да му објасни дека е објавено, претседателот ја прекина „дискусијата“ со зборовите – „не објавивте“.