10 февруари во историјата – Светскиот шампион во шах, Гари Каспаров, изгуби партија против компјутерот

На 10 февруари 1996 година, по три часа, светскиот шампион во шах Гари Каспаров го губи првиот од шесте мечеви против Deep Blue, компјутер на ИБМ способен да процени 200 милиони потези во секунда. Меѓутоа, човекот на крајот беше подобар од машината, бидејќи Каспаров имаше три победи против Deep Blue и две ремија и ја однесе наградата од 400.000 долари. Се проценува дека околу 6 милиони луѓе ширум светот го следеле мечот онлајн.

Каспаров претходно го победи Deep Thought, прототипот за Deep Blue развиен од истражувачите на ИБМ во 1989 година, но тој и другите шаховски велемајстори, повремено, губеа од компјутерите во игрите што траеја еден час или помалку. Натпреварот во февруари 1996 година беше значаен по тоа што го претставуваше првиот пат кога човек и компјутер беа на регуларен меч од шест партии, во кои секој играч имаше два часа да направи 40 потези, два часа да ги заврши следните 20 потези, а потоа уште 60 минути за да се заврши партијата.

Каспаров, кој е роден во 1963 година во Баку, Азербејџан, стана јуниорски шампион на Советскиот Сојуз во шах на 13-годишна возраст, а во 1985 година, на 22-годишна возраст, најмлад светски шампион досега кога го победи легендарниот советски играч Анатолиј Карпов. Сметан од многумина за најголемиот шахист во историјата на играта, Каспаров беше познат по својот стил на игра и неговата способност да ја менува тактиката на средината на партијата.

Во 1997 година, се одржа реванш меѓу Каспаров и засилениот Deep Blue. Каспаров ја доби првата партија, компјутерот втората, следните три беа ремија. На 11 мај 1997 година, Deep Blue изненадувачки ја доби шестата партија – и наградата од 700.000 долари.

Во 2003 година, Каспаров се бореше со друга компјутерска програма, „Deep Junior“. Натпреварот заврши нерешено. Каспаров се повлече од професионалниот шах во 2005 година.