Фон дер Лајен: Со Договорот од Преспа, проблемот го претворивте во можност

– Овој договор е вистински европски договор, базиран на вредностите што ги има Европа бидејќи можевте проблемот да го претворите во можност, рече министерката за одбрана на Германија.

Истакна дека Грција секогаш била поддржувач на интеграцијата на земјите од Западен Балкан во евро- атлантските организации.

-Во овие рамки Договорот од Преспа е пример за решавање на долгогодишен спор во регионот, со мирни средства. Согласно предвиденото од Договорот од Преспа, Грција ќе ја поддржи трансформацијата на вооружените сили на Северна Македонија за време на процесот на интеграција на земјата во НАТО, рече министерот за одбрана на Грција.

Урсула фон дер Лајен и Евангелос Апостолакис на нивната средба во грчкото Министерство за одбрана ги истакнаа тесните безбедносни односи меѓу двете земји и разговараа за зајакнување на билатералната одбранбена соработка.

Министерката за одбрана на Германија, по средбата со нејзиниот грчки колега, заедно со лидерот на Нова демократија, Кирјакос Мицотакис, учествуваше на настан организиран од Секретаријатот за меѓународни односи на Нова демократија и Институтот за демократија Константинос Караманлис, под наслов „Европската народна партија: ја гарантираме безбедност на ЕУ – ја градиме нашата заедничка иднина“.