Уметникот Жарко Башески изложува на фестивал во Унгарија меѓу уметници како Јоко Оно и Рита Акерман

Скулпторот и професор на Факултетот за ликовна уметност Жарко Башески со видеообраќање на ЛЕД-екран поставен на Дунав официјално го отвори третиот по ред фестивалот „Арт капитал“ во Унгарија. На годинешното издание на фестивалот, кој трае до 24 јуни, љубителите на современата уметност и хиперреализмот ќе може да уживаат во неговото најново дело „Asphyxia“ (Гушење), но и во делата на Јоко Оно, Рита Акерман, Моника Баер и други светски реномирани уметници.

„Огромна чест претставува да се учествува на фестивал од ваков калибар и да се изложува заедно со имиња од светски ранг. Благодарен сум на ‘Арт капитал’ за можноста вторпат на интернационалната јавност да ѝ претставам дел од македонската современа уметност. Минатата година имавме одлична соработка и што е најважно за мене, публиката позитивно одговори на пораките кои делата ги пренесуваат. Голема благодарност и до центарот ‘Кибла портал’ од Марибор, Словенија, и нивниот проект ‘МИГ 21’ за големиот придонес и поддршката без кои ова можеби немаше да се оствари“, изјави Башески.

Минатата година Башески дебитираше на фестивалот „Арт капитал“ со повеќе дела, кои беа една од главните атракции на самиот фестивал.
„И оваа година ‘Арт капитал’ е домаќин на светски уметнички имиња, меѓу кои и господинот Жарко Башески. По минатогодишната успешна соработка, оваа година одлучивме да биде меѓу уметниците кои го отворија фестивалот. Неговиот хиперреалистичен начин на изразување гради еден неконвенционален однос меѓу гледачот и делото создавајќи близина која граничи со непријатна реалност. Новото дело ‘Asphyxia’ не нуди никаков oчигледен предзнак или корисен наратив – неизбежно монументална, ‘главата’ се соочува со гледачот и со неговите сосема лични моменти, но и општо, со човечките димензии“, вели Габор Гулиас, уметнички директор на фестивалот.