Телеграма со сочувство од премиерот Заев по повод смртта на Кофи Ана

Претседателот на Владата на Република Македонија, Зоран Заев упати телеграма со сочувство до актуелниот генерален секретар на Обединетите Нации, Антонио Гутереш за загубата на поранешниот прв човек на ОН, Кофи Анан.
„Да продолжиме да работиме кон подобро организиран и помирен свет и на овој начин ќе оддадеме најголема почит за големиот визионер, лидер, нобеловец и пред сѐ човек, поранешниот Генерален секретар на ОН, Кофи Анан. Длабоко жалиме за загубата на Кофи Анан, како и целиот свет, изразуваме искрено сочувство до вас во Обединетите Нации, како колеги, до неговото семејство, но и до сите граѓани кои ја почитуваа и вреднуваа неговата работа како миротворец и борец за човековите права за сите луѓе“, се наведува во телеграмата од премиерот.
Тој, истовремено потсетува дека големите луѓе, како почитуваниот поранешен Генерален секретар на ОН, Анан, кои го посветиле својот живот на доброто во светот, остануваат да живеат во истиот тој свет преку делата со кои придонеле за доброто во него.
„За граѓаните на Република Македонија, Кофи Анан ќе остане запаметен како вреден пријател, поради неговиот придонес во демократскиот развој на државата, нејзиното меѓународно етаблирање и неговите заложби за обезбедување перспективна иднина на нашата држава и нашите граѓани во големото семејство на рамноправни народи и држави во светот. За сето тоа остануваме засекогаш благодарни. Нека почива во мир“, се наведува во телеграмата со сочувство од премиерот Зоран Заев.