Со изложба на маски почнаа карневалските свечености во Прилеп

Со изложбата на маски во Центарот за култура „Марко Цепенков“ денеска почна тридневниот карневалски спектакал во Прилеп „Прочка 2018“, коj ќе кулминира со главното карневалско дефиле в недела, на Прочка.

Oрганизаторите на карневалот, општина Прилеп и Здружението „Прилепски мечкари“ ги прогласија најдобрите од 700 маски на учениците од 15-те основни и средни училишта. Изложбата е традиционална и се одржува по 15-ти пат.

Според прилепскиот градоначалник Илија Јованоски на изложбата се гледа големата креативност на учениците во изработката на оригиналните маски.

– Задоволство е да се види на дело големата креативност на младите кои во иднина ќе бидат носители на карневалските случувања. Со оваа изложба всушност почнуваат тридневните карневалски активности за прилепскиот меѓународен карневал. Утре е детскиот карневал и во центарот на Прилеп ќе дефилираат оригинални поединечни и групни маски на учениците од училиштата под менторството на нивните наставници. В недела од 13 часот е главното дефиле на маските од земјава и странство. Се очекува да учествуваат околу 1.000 маскирани, а жири-комисијата ќе ги прогласи најдобрите поединечни и групни маски. Карневалскиот спектакл ќе заврши в недела вечер со заедничката забава на маските, рече Јованоски.

Комисијата од наставници од прилепските училишта избра шест најдобри маски, три првонаградени, а три освоија второ место. Првонаградени се маските на учениците Димитар Илиоски од основното училиште „Блаже Конески“ кој изработи венецијанска маска и средношколците Иван Крстески од средното училиште „Ѓорче Петров“ и Давор Стефаноски од средното „Орде Чопела“. Второнаградени се маските на Дневниот центар „Ѕуница“, на Андреа Мирческа од основното училиште „Кирил и Методиј“ од селото Подмол и маската на Александар Гулабоски од гимназијата „Мирче Ацев“. Со трета награда се наградени маските на учениците: Марија Долеска, Сених Келенкоски и на Филип Трајкоски.

Една од трите првонаградени е маската што ја изработи средношколецот Иван Крстески, кој вели дека ја направил маската „Четири годишни времиња“.

– Годишните времиња се претставени во вид на огледало и е изработена од природни материјали. На маската работев две недели со поддршка на мојата професорка по ликовно образование, вели Крстески кој изработува маски од седмо одделение.