Службеник во Амбасадата на САД во Москва носел бомба на аеродром

Службеник во американската Амбасада во Москва денеска се обидел да влезе во аеродромот Шереметјево носејќи бомба со осигурувач во багажот, но без експлозив.

– Аеродромскиот персонал го скенирал багажот на службеникот во Амбасадата на САД и откриле предмет кој изгледал како бомба, изјавил за агенцијата Тас извор од руското Министерство за надворешни работи.

Потоа биле повикани техничари кои потврдиле дека е бомба со осигурувач но без експлозив, иако во телото на бомбата имало траги од експлозив.

Аеродромската полиција веднаш ја известила американската Амбасада за инцидентот.

– Очекуваме од Амбасадата да го објасни однесувањето на нејзиниот службеник, рекол истиот извор.

Службеникот изјавил дека си заминува од Русија затоа што му завршил мандатот во американската Амбасада и тврдел дека бомбата ја купил за своја лична колекција. Бомбата му била одземена, а тој заминал за Њујорк.