Партијата на Каменос нема да го поддржи Договорот, ниту иницијативата за недоверба на Владата на Ципрас

Помалиот коалициски партнер во грчката Влада, десничарската партија Независни Грци на Панос Каменос, најави дека нема да го поддржи ниту Договорот со Македонија, ниту предлогот на опозициската Нова Демократија за недоверба на владиниот Кабинет, иако иницијативата беше токму поради постигнатиот Договор.

Партијата Независни Грци на грчкиот министер за одбрана Панос Каменос, останува на досегашниот став во однос на прашањето со името, но паралелно и натаму ја поддржува Владата.

– Пратеничката група по состанокот и сега кога е во салата за време на седницата испраќа една порака. Прво едно големо благодарам до (лидерот на Нова демократија) Кирјакос Мицотакис за можноста што ни ја дава два дена да го прашаме лице во лице. Конечно да одлучи која е позицијата на Нова демократија. Конечно да реши да одбере меѓу кои позиции и линии ќе се движи, изјави портпаролот на Независни Грци, Теодорос Тосунидис.