Шефот на „алфите“ со службено возило на викенд во Охрид
На денот кога Владата треба да го разреши Лазо Велковски, директор на Бирото за јавна безбедност, чија ќерка со службен џип на Министерството за внатрешни работи замина на летување во Грција, МВР го стресе уште еден сличен скандал. Примислав Димовски, командант на единицата „Алфа“, изминатиот викенд со службен автомобил „шкода“ престојувал во Охрид, каде што, наводно, требало да присуствува на свадба кај ќерка на негов пријател во еден од угостителските комплекси до езерото. До редакцијата на „Независен весник“ пристигнаа фотографии на кои се гледа спорното возило снимено во Охрид.
Во МВР вчера побараа прашањето да им го доставиме по електронски пат, но одговор не добивме до затворањето на бројот. Го контактиравме и Димовски, но тој ни рече дека не смее да зборува со новинари без да добие дозвола од неговите надредени. Неговите блиски ни потврдија оти тој навистина бил во Охрид, но демантираат дека присуствувал на свадба, односно дека природата на неговата посета била приватна. Од друга страна, според нив, Димовски бил еден од десетината началници во МВР што имале овластувања да патуваат со службено возило кога сакаат (24 часа на ден) и каде што сакаат низ Македонија.
Функционери во МВР, пак, потврдуваат дека тој може да оди каде што сака, но нема овластување да работи надвор од Скопје, освен доколку не добие посебен налог од неговите претпоставени – во случајов, началникот на скопската полиција Тони Јакимовски поради што е проблематичен неговиот излет во Охрид. Имено, пред четири години, „Алфа“ доби статус на посебна единица за прв одговор и интервенција во рамки на СВР (Сектор за внатрешни работи) Скопје поради што овластувањата важат исклучиво на територијата на Град Скопје.
Примислав Димовски е поранешен истакнат боксер, неколкукратен државен првак, кој пред неколку месеци беше поставен и за претседател на Боксерската федерација на Македонија. На чело на „алфите“ беше именуван секојпат кога со МВР раководеше Оливер Спасовски, па дури и кога беше технички министер во владата на ВМРО-ДПМНЕ. Го наследи Ивица Антевски-Пуки, чиј глас се слуша на еден од прислушуваните разговори што ги објавуваше тогашниот претседател на СДСМ, Зоран Заев. Полициската единица „Алфа“ е задолжена за интервенции во урбани средини за спречување тешки облици на криминал.
Пред само десетина дена полициски џип на МВР беше сликан на грчка патарина и пред грчкиот камп Евридики. По внатрешната истрага што ја спроведе, министерот за внатрешни работи Оливер Спасовски утврдил дека не била запазена процедурата за службено патување и, и покрај налогот, не било потпишано решение за службено патување. Поради ова, Спасовски до Владата поднесе предлог за разрешување на Лазо Велковски, што се очекува да биде прифатено на денешната седница.
„Имиња за негов наследник сè уште немаме, не сме размислувале бидејќи не се надевавме дека ќе се случи ваква грешка. Ќе ни треба време да најдеме вистинско решение. Тој е еден од моите први соработници, верувам дека и натаму ќе биде значаен партнер во МВР бидејќи е важен поради неговото искуство. Исправен пред заканите што од минатото биле насочени кон него и кон неговото семејство, ја направил грешката“, рече премиерот Заев.
Тој демантираше дека неговата смена е резултат на внатрепартиски пресметки во СДСМ. Го оцени Велковски како професионален член на СДСМ, кој од секогаш важел за сплотувачки елемент во партијата и додаде дека неговото разрешување е чин на понесување на одговорност – нешто што граѓаните на земјата го очекуваат од носителите на јавни функции.
Во врска со тоа дали разрешувањето на Велковски и неприфаќањето на оставката на вицепремиерот задолжен за економски прашања Кочо Анѓушев претставува примена на двојни аршини, Заев рече дека во случајот со Велковски е констатирана и потврдена грешка.
„Во случајот со грантовите на Фондот за иновации, секој според законот во РМ има право да аплицира. Нема грешка согласно законот. Законот еднакво важи за сите. Имаме еклатантни примери каде што тоа веќе сме го докажале. Ако кој било се огреши пред законот, треба да одговара. Ако некој направи грешки и од технички аспект, треба да ја понесе одговорноста“, истакна Заев.
Горан Адамовски