„Исцелител“ премиерно ќе биде прикажан во Калифорнија


Филмот „Исцелител“ на режисерот Ѓорче Ставрески на 1 февруари премиерно ќе биде прикажан на престижниот филмски фестивал во Санта Барбара, Калифорнија.

Филмот ќе има уште две проекции во текот на фестивалот и ќе се прикажува во компетитивна селекција на интернационални филмови заедно со уште 11 филма.

Ова е 32. издание на интернационалниот филмски фестивал во Санта Барбара. Со своите активности, тој последните години е еден од водечките филмски фестивали во САД, кој нуди дела од независната и интернационална кинематографска сцена и привлекува повеќе од 90.000 гледачи.

Во рамки на фестивалот се оддаваат и посебни признанија на филмските ѕвезди. Некои од добитниците на наградите од изминатите години се Анет Бенинг, Мартин Скорсезе, Квентин Тарантино, Џенифер Лоренс и Шарлиз Терон, а овогодинешна добитничка е Серше Ронан за улогата во филмот „Lady Bird“.

„Исцелител“ викендот премиерно беше прикажан во Кочани, каде двете проекции беа проследени со огромен интерес од страна на многубројната публика. Филмот веќе девета седмица се прикажува во кината во Скопје, а досега имаше и проекции во Битола и Штип. „Исцелител“ во кино салите досега беше прикажан пред повеќе од 10.000 домашни гледачи.

Прочитајте го ТУКА целосното интервју на актерот Благој Веселинов, кој го игра главниот лик во „Исцелител“.