Изложба „Суперпутин“: Путин јава на мечка, се бори со тигар, пука од минофрлач (ВИДЕО)


На изложбата „Суперпутин“, која е посветена на рускиот претседател Владимир Путин, посетителите ќе можат да видат слики и скулптури кои актуелниот претседател на Русија го прикажуваат како Супермен, јава на коњ, јава на мечка, љубител на животни, дури и како Дедо Мраз.

Во големата сала на музејот сместен во простории на поранешна фабрика во центарот на руската престолнина посетителите ќе можат да уживаат во сликите и скулптурите кои рускиот претседател го прикажуваат додека нежно милува кученце, го подига руското знаме, безгрижно јава на мечка, покажува „натчовечки“ особини при средба со тигар, на Арктикот се дружи со поларна мечка или храбро пука од минофрлач.

„Секоја изложена слика или скулптура истакнува некој од квалитетите на нашиот претседател“, вели за АФП, Јулија Жуљева, организаторка на изложбата која ќе биде отворена до 15 јануари, а на која се изложени 30 слики и скулптури кои ги имаат создадено млади уметници.

„Секој од младите уметници го има претставено Путин во некој позитивен аспект. Секој од нив го сака, почитува и го поддржува“, рече 22-годишната Жуљева.