Заев во четврток во Стразбур, ќе се обрати пред Европскиот парламент

Премиерот Зоран Заев ќе се обрати во четврток изутрина пред Европскиот парламент во Стразбур.

Како што стои во соопштението објавено на интернет страницата на Европскиот парламент, се очекува македонскиот премиер да стави акцент во својот говор на обезбедувањето „јавна и опозициска поддршка за промена на името и за следните чекори потребни за можното пристапување на Македонија во ЕУ“.

Комитетот за надворешни работи на Европскиот парламент се очекува подоцна во текот на оваа есен да гласа за извештајот за Македонија за 2018 година. Известувачот за нашата земја Иво Вајгл го поздрави прелиминарниот договор за името со Грција.