Ердоган: САД доставија оружје на терористички групи во Сирија

САД доставија големо количество оружје на терористички групи на територијата на Сирија, изјави денеска турскиот претседател Реџеп Тајип Ердоган.

– Ако сме стратешки партнери, тоа значи дека вие – САД, треба да не почитувате и да престанете да не лажете, изјави Ердоган. – Во Сирија сте испратиле пет илјади камиони со оружје и две илјади контејнери со муниција. Значи, го одбивте нашето барање, а сте ги снабдувале терористичките групи со оружје. За какво партнерство станува збор?, праша Ердоган, без да прецизира што Турција побарала од САД..

Тој дополни дека во моментов тоа оружје преминува во рацете на турската армија.

– Пронаоѓаме тунели, а во нив складишта со оружје, гледаме домови – полни со муниција. Го уништуваме сето, истакна Ердоган.

Турската армија на 20 јануари ја почна операцијата „Маслиново гранче“ во реонот на Африн. Операцијата е насочена против Силите за заштита на народот и Партија на демократската унија на сириските Курди, кои Анкара ги смета за терористички организации, поврзани со Курдската работничка партија (ПКК).