Дождовите го принудија Државен архив да бара нова зграда

Државниот архив ќе се сели во нова зграда оти објектот од „Скопје 2014“ се поплавува после секој дожд. Архивот сега се наоѓа во зградата на Археолошкиот музеј која беше поплавена и изминатиов викенд при што се загрози архивската документација.

„За жал, ова е уште еден доказ за нестручно изведен објект. Заедно со Владата размислуваме за нова локација за Државниот архив. Бараме нова зграда оти во овој објект на Археолошкиот музеј при секој дожд се соочуваме со прокиснување и се загрозува архивската граѓа. Комплетно ќе се преселат и вработените кои сега работат во несоодветни услови и целокупната документација која ја поседува Архивот. Се уште немаме одлука каде ќе се сели Архивот оти убаво треба да ги разгледаме сите опции не би сакале да имаме домино ефект, да решиме еден проблем, а да создадеме нов“, изјави денеска министерот за култура Роберт Алаѓозовски. Тој истакна дека Архивот е загрозен речиси при секој пообилен дожд.

Тој се пресели во зградата на Археолошкиот музеј пред речиси две години и се наоѓа на шестиот и седмиот спрат во зградата. Вработени неколкупати сведочеа дека при секој пообилен дожд, водата прокиснува од сите страни, па превентивно се поставуваат кофи на секој чекор. Архивската документација, пак, се спасува преместувајќи се од една во друга просторија.

Инаку, изградбата на зградата на Археолошкиот музеј, каде е сместен Архивот, чинеше околу 42 милиони евра. Таа не е единствената што се поплавува при секој пороен дожд. Со слични проблеми се соочуваат поголем дел од градбите од „Скопје 2014“ кои се наоѓаат на кејот на Вардар.