Анализа: Грците најмногу пушат, а Литванците се први во пиење во ЕУ

Белгијците јадат најмногу, Французите најмногу време поминуваат на трпеза, Литванците најмногу пијат, а најмногу пушачи во ЕУ има меѓу Грците, покажа анализата на „Политико“.

Во однос на храната, односно сметајќи колку калории дневно консумираат, први на листата се Белгијците со 3.793 калории, потоа Австријците со 3.784 и Ирците – 3.591. Франција и Германија се во златната средина – 3.524 и 3.539, како и Италија. Бугарите во просек внесуваат по  2.877 калории дневно, речиси исто колку и Словаците –  2.902.

Односот кон трпезата се гледа и според времето кое се минува на неа. Прваци се Французите, кои во просек, дневно, минуваат по 135 минути јадејќи. Следуваат Италија и Белгија – 114 и 109 минути, Полска – 94 минути, а  Финците се уште побрзи – 81 минута минуваат на трпеза.

Кога станува збор за алкохолниот пијалак, први на листата се Литванците, каде секој од нив во просек пие по 15,4 литри алкохолни пијалаци годишно. Зад нив се Романците со просек од 14,4 литри годишно по глава на жител. Унгарците заостануваат, но не многу – тие пијат по 13,3 литри. Бугарите, слично како и Британците се поумерени и пијат по 11,4 литри по човек, односно 11,6 литри.

Кога е во прашање „светот на пушачите“, Грците се број еден. Таму цигари консумираат 37 отсто од населението, Во Бугарија и Франција тој процент е 36 отсто, во Хрватска – 35 проценти, а на дното на листата се Швеѓаните каде пушат само седум проценти од населението.

Кога станува збор за времето поминато пред „синиот екран“ предничат Романците, кои пред телевизор минуваат по 329 минути на ден или повеќе од пет часа. По нив следат Грците, кои се „поумерени” и минуваат само 258 минути гледајќи телевизија, но и Германците се тука некаде со по 223 минути дневно. Швеѓаните, по се изгледа, имаат сосема поинаков животен стил, па само 149 минути дневно се пред екраните.

Кога се во прашање навиките за пиење кафе, апсолутни шампиони се Финците, кои просечно пијат по 12 килограми кафе годишно. Германците и Французите се меѓу поскромните – 5,5, односно 5,4 килограми кафе, а на крајот на списокот се Бугарите и Романците кои пијат по 2,9, односно 2,4 килограми кафе годишно.