Албанската опозиција обвинува: Поранешни оперативци на Сигурими на високи функции во ШИШ


Албанската опозиција обвини дека по доаѓањето на Хелидон Бендо на чело на албанската тајна служба ШИШ, спротивно на законот, девет поранешни припадници на комунистичката тајна служба „Сигурими“ биле поставени на високи раководни функции.

Изнесувајќи го партискиот став, пратеникот на опозициската Демократска партија, Енкелејд Алибеај изјави дека „по соработка со криминалот“, албанскиот премиер Еди Рама „на највисоки раководни функции во ШИШ ги вратил луѓето од најсуровата тајна служба во источниот блок“.

„Соработка со криминалот и корупцијата се двете најистакнати карактеристики на Владата на Еди Рама. Но, шемата на неговото владеење е нецелосна ако останат надвор од државната безбедност луѓето од најсуровата тајна служба на Истокот. Откако ги прими во Влада сите наследници на Партијата на трудот, негови блиски пријатели, Рама на значајни раководни функции врати поранешни офицери и оперативци на Сигурими“, обвини Алибеај.

Објавувајќи ги имињата на деветмината нови функционери во ШИШ, Алибеај обвини дека дел од нив биле вмешани во трговија со дрога. Тој е убеден дека мнозинството Албанци ќе одговорат „со едно силно НЕ“ на прашањето дали веруваат дека редот, правдата и безбедоста може да ја гарантираат луѓе кои тероризирале и масакрирале и кои ги држеле албанските граѓани во изолација.

„Демократската партија е убедена дека мнозинството албански граѓани ќе одговорат со едно силно НЕ! Државната безбедност не може да ни даде ни правда, ни ред, ни безбедност! Најдобрата услуга што можеме да ја направиме денес за нашата земја, без да губиме време, е да се ослободиме од архитектот (Рама) на владеењето со државната безбедност“, порача Алибеај.

Албанскиот претседател Илир Мета, по една година од добиениот предлог од страна на премиерот Рама, уредбата со која Хелидон Бендо стана директор на  албанската тајна служба ШИШ, ја потпша на почетокот на месец ноември.