Филипче: Малите сипаници нѐ загрижуваат

Епидемиите кои што ни се јавуваат на мали сипаници многу не загрижуваат, не сакаме да дозволиме да ни се вратат некои болести кои што многу одамна веќе биле искоренети во нашата земја, изјави денеска министерот за здравство Венко Филипче.

– Вакцините се многу важни. Епидемиите кои што ни се јавуваат на мали сипаници многу не загрижуваат, не сакаме да дозволиме да ни се вратат некои болести кои што многу одамна веќе биле искоренети во нашата земја. Гледам многу лоши примери околните земји. Покренавме многу кампањи заради тоа што навистина сметаме дека дечињата немаат апсолутно никаков ризик од вакцините, ниту пак може тие да се доведат во врска со било кое пореметување на здравјето. Тоа само едни анти-кампањи кои што се темелат на неточни податоци, изјави Филипче.

Министерот Филипче, на доделувањето на наградите на конкурсот за ликовни творби на тема „Чисти раце-Добро здравје“, на дечињата им укажа на тоа дека одржувањето на хигиената е многу важно и значи добро здравје.

– Рачињата мора постојано да ги миете, заради тоа што фаќаме се со рацете и се лепат бактерии и нечистотија, доколку рачињата не се измијат. Тоа преку храната може да се внесе во устата и на тој начин настануваат многу болести и инфекции, ги предупреди присутните деца министерот Филипче.

Конкурсот по повод 15 октомври – Светскиот ден за миење на рацете и ден за подигнување на свеста за чисти раце и грижа за нашето здравје е во организација на Министерство за здравство со поддршка на Министерство за образование и наука, и во него учествуваа повеќе од 500 ученици од I до V одделение од сите основни училишта во Република Македонија.