Ред Бул посиромашни за 15 милиони евра поради новите правила

Промените во правилата за аеродинамиката, кои наметнуваат ново предно крило за 2019 година, го чинеа Ред Бул 15 милиони евра. Ова го изјави тимскиот советник, д-р Хелмут Марко, но додаде дека инвестицијата вреди, бидејќи перформансите се подобриле.

Кога измените на правилата беа објавени, тимот за енергетски пијалаци се спротивстави поради две причини: недостаток на веродостојни податоци и прекумерни финансиски трошоци.

Марко за „Моторспорт“ изјави дека тимот веќе постигнал добро ниво со новото крило, но тие станале посиромашни за 15 милиони.

– Ги постигнавме истите аеродинамични податоци, какви што имавме минатото лето. До првиот старт во Мелбурн се надевам дека ќе бидеме уште подобри. Веќе има добра основа за дискусија меѓу Мерцедес, Ферари и нас. Се согласуваме дека правилата не треба да се пишуваат од инженери. Штом интервенираат технички лица, трошоците веднаш се зголемуваат, и сè станува многу комплицирано. Работите треба да се јасни, вели Марко.

Австриецот, исто така, рече дека сегашните промени главно се должат на Мерцедес.

– Секој гледа колку му е тешко на Мерцедес да престигнуваат, кога се наоѓаат зад други болиди, додаде советникот на „биковите“.