Почнува да се гради подземната сообраќајница кај „Рамстор“

Започнува изградбата на подземната сообраќајница зад Трговскиот центар „Рамстор“ во центарот на Скопје. Градежните активности од страна на компанијата „Лимак“ ќе траат шест години, поради што од утре (среда) ќе биде воведен привремен собраќаен режим. Ќе се изврши промена на трасата на линијата „9“, а ќе се дислоцира и една автобуска постојка. Од ЈСП Скопје велат посочуваат дека автобуското стојалиште на булеварот „Македонија“, кое е во непосредна близина на катната гаража (наспроти седиштето на „Макпетрол“), привремено ќе се премести на улицата „Јордан Мијалков“ (поранешна улица „Железничка“), после пешачкиот премин кој води до паркот „Урбан парк“. Променета ќе биде и трасата на движење на автобуската линија „9“, во насока од Клиничкиот центар кон Скопје Север. Автобусите од посочената линија на крстосницата меѓу улицата „Јордан Мијалков“ (поранешната улица „Железничка“) и улицата „Герман“, нема да вртат лево кон булеварот „Македонија“, туку, ќе продолжат да се движат право и истите подоцна ќе се приклучат кон булеварот „Македонија“ преку привремена улица пред натпатникот на улицата „Павел Шатев“, при што ќе продолжат да се движат по постојната траса на линијата „9“. Од ЈСП Скопје апелираат сите учесници во сообраќајот да се придржуваат на привремено воведениот сообраќаен режим, да ја почитуваат поставената патна сигнализација и брзината на движење да ја приспособат на условите на патот.

Фото: Борис Грданоски