Новиот руски амбасадор Баздникин му ги предаде акредитивите на Димитров

Вонредниот и ополномоштен амбасадор на Руската Федерација во Република Македонија, Сергеј Баздникин, денеска ги предаде копиите на акредитивните писма на министерот за надворешни работи Никола Димитров.

– Посакувајќи му успех во извршувањето на одговорната функција на амбасадорот Баздникин, министерот Димитров подвлече дека Република Македонија, стратегиски ориентирана кон евроатлантските интеграции, придава значење и на натамошно унапредување на односите со Руската Федерација и интензивирање на соработката во сите областите од заемен интерес, соопшти Министерството за надворешни работи.

Баздникин доаѓа на местото на Олег Шчербак кој ја вршеше амбасадорската функција во Македонија од 2010 година.