Македонската влада не се откажува од „Република Илинденска Македонија“

„Република Илинденска Македонија“ е име со временска одредница кое се повикува на конкретни датуми од минатото и е реална можност за компромис кој ги задоволува двете страни. Очекуваме дека предлогот ќе биде разбран и ќе најде поширока поддршка во Атина, соопшти денеска македонската Влада, се наведува во соопштението што го испрати претпладнево владиниот кабинет, откако синоќа беше соопштено дека последниот предлог за името не е прифатлив за грчкатa страна.

– Со ова име, правиме целосно разграничување со регионот Македонија во Грција. Разграничување од секој аспект. Илинденското востание е заедничка борба на нашиот мултиетнички народ за социјални права и слободи. И нема никакви територијални аспирации према ниту една соседна земја, вклучително и Грција. Тоа е истата борба, и во 1903 и во 1944 година, се наведува во соопштението на Владата.

Од Владата додаваат дека Македонија и граѓаните немаат никакви територијални претензии и ги потврдуваат неменливоста на границите и почитувањето на наследството на грчкиот народ и Грција.

– Владата на Македонија ќе ги продолжи разговорите со Владата на Грција се до изнаоѓање дефинитивно решение на 25-годишниот спор. Никогаш не сме биле поблиску до решение, а пријателството меѓу двете земји и двата народи никогаш не било поголемо. Ќе ги вложиме сите напори да извлечеме максимум од овој позитивен историски момент за двете држави, наведува Владата на РМ.