Лавицата од скопската Зоолошка ја загуби битката со туморот

Скопската Зоолошка градина се прости од 20-годишната лавица откако не можеше да ја спаси од малигниот тумор кој прво ѝ се појавил на лицето, а сега се раширил низ целото тело.
По низата операции за отстранување на туморот, тој постојано се враќал поагресивен, по што лавицата била евтанизирана.
„Со тешко срце и насолзени очи се простивме од нашата лавица која долго време беше член на ЗОО семејството. Малигниот тумор кој започна да се развива на лицето, метастазираше низ целото тело. Уште во септември минатата година добивме препорака за еутаназија од ЕАЗА(Европска асоцијација на зоолошки и аквариуми), но решивме да не се откажеме од борбата. Иако во соработка со Ветеринарниот институт направивме неколку операции за отстранување на туморот, секој пат се враќаше се поинванзивен. Дијагнозата беше Fibrosarcoma- малиген тумор на кожа и поткожје со голем број на митотични и апоптични клетки, некрози и местимични крварења. Лекувањето за жал беше неуспешно, а лавицата која храбро се бореше со најлошата болест на денешницата беше евтаназирана. Секој од нас има изгубено блиска личност од ова зло, а ние ја изгубивме 20 годишната мила жителка на ЗОО Скопје. Тагата е преголема. Почивај во мир убавице и трчај слободно горе на небото“, соопштија од ЗОО.