ИЈЗ: Регистрирани 2.943 заболени од грип

Во текот на изминатата недела (од 11 февруари до 17 февруари), во државава се регистрирани 2.943 заболени од грип, што е зголемување за 31 отсто споредено со неделата пред неа кога беа регистрирани 2.246 заболени од грип, се наведува во извештајот, што на својата веб страница го објави Институтот за јавно здравје.

Бројот на пријавени лица оваа недела е помал за 21,1 отсто споредено со истиот период минатата сезона.

Оваа недела, во вирусолошката лабораторија на ИЈЗ пристигнати се 112 материјали за тестирање на грип, од кои 72 (64,3 отсто) позитивни за присуство на вирусот на грип – 50 Influenza A(H1)pdm, девет Influenza A(H3) и 13 Influenza А несуптипизиран.

Најголем број заболени (1.861) се пријавени во најголемата возрасната група од 15-64 години, а највисока инциденца од 284 на 100.000 жители е регистрирана кај децата на возраст до четири години.

Според податоците од 26 извештајни единици, најголем број заболени се пријавени од подрачјето на Центарот за јавно здравје Струмица (486), а највисока инциденца е регистрирана на подрачјето на Подрачната единица Кавадарци (673,9 на 100.000 жители).

Во сезоната 2018/2019 вкупниот број на заболени од грип изнесува 9.314.

Според податоците добиени од Управата за електронско здравство, вакцинирани се 19.992 лица со бесплатни вакцини против сезонски грип (лица постари од 65 години со просечна, потпросечна пензија или без примања), односно 71,4 отсто од вкупниот број набавени вакцини.