Димитров: Не гледам посоодветен предлог од Република Илинденска Македонија

Министерот за надворешни работи Никола Димитров изјави дека не гледа посоодветен предлог за решавање на спорот од Република Илинденска Македонија

– Не гледам во моментов посоодветен предлог околу кој и двете преговарачки страни имаат согласнот за решавање на спорот, рече Димитров во емисијата „Печат на неделата на „1ТВ“.

Посочи дека Илинден го има во двете преамбули на Уставот и оти тоа се двата столба на нашата државност.

– Тешко е да си за Македонија, а да не си за Илинденска Македонија, рече Димитров.

Шефот на дипломатијата,исто така, рече дека ќе се смета себеси за одговорен ако не успее процесот на преговори за решавање на проблемот со името со Грција.

– Веднаш ќе потпишам оставка, ако мислам дека тоа ќе и помогне на Македонија и дали ќе биде подобра без мене, дали процесот ќе биде подобар без мене. Прашањето на мојата лична одговорност е имаше ли нешто што можеше да го направам, а не го направив и направив ли нешто што не помогна. И без одговорност, ако има ефект мојата оставка да помогне, апсолутно сум спремен во кое било време да ја поднесам, тоа е поголемо од мене, рече Димитров на прашањето „каде ја гледа својата одговорност ако не успее преговарачкиот процес“. 

Додаде дека во пакетот за името, Грците се согласни дека ја признаваат македонската нација, а јазикот со овој предлог треба да биде македонски, со превод на сите јазици, со што не се заканува македонскиот идентитет.

Во емисијата , освен министерот Димитров учествуваа и екс-шефот на дипломатијата Александар Димитров и надворешно политичкиот новинар и коментатор Љупчо Поповски.

По последните реакции во Грција и неприфаќањето на предлогот експресно откако премиерот Заев го објави јавно, Александар Димитров реакциите ги доживува како ладен туш, потецирајќи оти неминовно е дека во ваквиот епилог вмешаност има и Кремљ.

Љупчо Поповски анализираше дека во Македонија еднострано се гледа на премногу диверзифицираното грчко општество, при што потенцираше дека после ваков вид на фијаско, клучно прашање е како процесот ќе се одвива понатаму.