Грчкиот парламент донесе Закон со кој на хомосексуалните двојки им се дозволува да чуваат деца

Грчкиот Парламент денеска го изгласа Законот, со кој на хомосексуалните двојки им се дозволува да чуваат деца. Законот беше донесен и покрај спротивставувањето на десницата.

Текстот беше изгласан со гласовите на 161 пратеници, а 103 гласаа против.

Во салата присуствуваа 264 пратеници од вкупно 300-те во Парламентот, откако неонацистичката партија Златна зора побара поединечно гласање за Законот. Легислативата беше усвоена со помош на гласовите на владејачката СИРИЗА и левичарската опозиција.

Конзервативната Нова демократија, главна опозициска партија, се спротивстави на оваа реформа.

– Ова е мал чекор од страна на Владата, која вети многу повеќе, а не го почитува, вели Григорис Валианатос, ветеран за хомосексуалната кауза во Грција.

Тој потсети дека и покрај дадените ветувања на Ципрас додека беше во опозиција, грчкиот премиер не предложил законски чекори за решавање на хомосексуални бракови или посвојување на деца од хомосексуални двојки.

– Има обичај да се каже дека грчкото општество е конзервативно, но, на крајот успеа да се покаже дека не е дотолку, вели активистот за правта на хомосексуалците, Лео Каловирнас.