Велковски: Се надевам дека со напорна работа ќе успеам да бидам дел од она што е Лазаров

Македонската селекција со пораз од олимпискиот парвак Данска го заврши својот настап на Европскиот шампионат во Хрватска.

Можеби, по првата фаза од која црвено-жолтите префрлија три бода, амбициите се зголемија, но сепак, поразите на трите средби во Вараждин повторно не вратија во реалноста.

Сепак, оваа макеонска селекција покажа дека има и квалитет во младите ракометари кои допрва треба да го понесат товарот на големите натпреварувања.

Еден од нив е и Мартин Велковски кој по повредата на Кирил Лазаров достојно го замени капитенот и потврди дека на него сериозно треба да се смета во иднина.

-Се надевам дека не ја разочаравме македонската публика. Ова за мене е големо искуство. Тешко е да го заменам Кирил Лазаров. Се надевам дека со напорна работа по неколку години ќе успеам да бидам барем дел од она што е Лазаров, изјави по мечот Мартин Велковски.

Македонија првенството во Хрватска го заврши со две победи (Словенија и Црна Гора), одигра нерешено против сеуште актуелниот европски шампион Германија, а поразите дојдоа од Шпанија, Чешка и Данска.

За црвено-жолтите, ова беше петто учество на ЕП (1998, 2012, 2014, 2016, 2018), а најголемиот успех останува оној од шампионатот во Србија (2012 година) кога Македонија заврши на петтото место.