Вардар преку Кил ќе се обиде да стигне до Келн

Бранителот на трофејот во Лигата на шампионите за ракометари, тимот на Вардар попладнево го очекува реваншот од четвртфиналето со германски Кил.

„Црвено-црните“ имаат гол предност од првиот дуел и се во добра позиција, втор пат по ред да патуваат на Ф4 завршниот турнир во Келн.

Сепак, во таборот на Вардар се свесни дека ништо не е готово и покрај победата во Германија.

– Ова ни е последен меч од Лигата на шампионите сезонава во Скопје. Имаме еден гол разлика од првиот натпревар и сметам дека овој резултат е добар. Сега играме дома и пред нашите навивачи. Сепак, не се опуштаме, свесни сме дека Кил има квалитет. Има одлични ракометари кои ќе знаат да се снајдат и во Скопје. Моите ракометари се подготвени и сакаме уште еднаш да играме во Келн, вели Раул Гонзалес тренерот на македонскиот тим.

Натпреварот ќе се игра во СЦ „Јане Сандански” со почеток во 17 часот.